یہ مرے عشق کا دائرہ صاحبا

 یہ مِرے عشق کا دائرہ صاحبا

ہے تِرے گرد ہی گھومتا صاحبا

تیری آواز سے یوں ہری ہو گئی

جیسے مجھ میں ہو  سورج اُگا، صاحبا

اپنا ہونا مجھے راس آیا نہیں

پھر مجھے تیرا ہونا پڑا، صاحبا

گر یہ سچ ہے کہ میری ہے کُل کائنات

پھر تو سچ ہے کہ تُو بھی مِرا صاحبا

اب محبت عبادت کے درجے پہ ہے

لے، تِرے سامنے سر جُھکا، صاحبا

روح تو بعد میں مجھ میں ڈالی گئی

پہلے تُو مجھ میں پُھونکا گیا، صاحبا

میری آنکھیں تِری دید کی لالچی

یعنی تُو مجھ کو یوسف نُما، صاحبا

ناہید ورک