دشت سے لوٹ کے جانا بھی نہیں آتا ہے

 دشت سے لوٹ کے جانا بھی نہیں آتا ہے

اور مجھے خاک اُڑانا بھی نہیں آتا ہے

تیرے کیا خواب چُراؤں گا کہ مجھ ایسوں کو

باغ سے پھول چُرانا بھی نہیں آتا ہے

کچھ نہ کچھ چھوڑ کے جاتے ہو ہمیشہ مجھ میں

تم کو تو ٹھیک سے جانا بھی نہیں آتا ہے

عشق ہے مجھ کو زمیندار کی لڑکی سے جسے

جسم پر گھاؤ اگانا بھی نہیں آتا ہے

بھول جاتا ہوں کہ وہ بھی ہے مِری دنیا میں

اور اسے یاد دلانا بھی نہیں آتا ہے

میں نے پھر اس سے کیا ہے وہی وعدہ تابش

وہی وعدہ جو نبھانا بھی نہیں آتا ہے

توصیف تابش