بچ بچ کے تیری راہ سے چلنا تو تھا مجھے

 بچ بچ کے تیری راہ سے چلنا تو تھا مجھے

تُو جو بدل گیا ہے بدلنا تو تھا مجھے

سورج پرست چھوڑ گئے ہیں غروب پر

نصف النہار شمس تھا ڈھلنا تو تھا مجھے

دنیا پڑی ہوئی تھی نگاہوں کے سامنے

دنیا کی گمرہی سے نکلنا تو تھا مجھے

طغیانیوں نے گھیرا ہوا تھا قریب سے

گہرے سمندروں سے اچھلنا تو تھا مجھے

اپنی مراجعت کا تصور تھا پیش رو

الٹی طرف پہ عشق میں چلنا تو تھا مجھے

اس کے قریب بیٹھے تھے ناآشنائے حسن

ساعتِ اشتعال تھی ٹلنا تو تھا مجھے

میں کہ چراغِ مرقدِ حسرت تھا اس لیے

شامِ فراقِ یار میں جلنا تو تھا مجھے

آنکھوں کے درمیاں سے گزرنا پڑا اسد

بارِ گراں تھا سر پہ سنبھلنا تو تھا مجھے

اسد اعوان