بہار دل میں ہے پِھر خوفِ خزاں کیسے ہو
یہ کیفیات کا لفظوں میں بیاں کیسے ہو
جو لطفِ یار میسر جہانِ خلوت میں
وہ لطفِ یار کا اظہار یہاں کیسے ہو
جس نے گُدڑی میں صبر و شُکر کے موتی رکھے
شہرِ خود غرض میں محتاجِ زماں کیسے ہو
دیارِ عشق میں غفلت کو موت کہتے ہیں
اسیرِ نفس کے دل پر یہ گماں کیسے ہو
جسے خبر ہو اُتاریں گے قبر میں اک دن
جہاں ہو لذتِ دنیا وہ وہاں کیسے ہو
اذانِ حق کی تجلّی کا نُور ہے دل میں
کسی کے خوف سے خاموش زباں کیسے ہو
ترکِ لذات کے برکات کی دنیائے حسیں
بدنگاہوں کی نگاہوں میں عیاں کیسے ہو
عرشِ اعظم سے اُترتی ہے سکوں سینے میں
مقصدِ زندگی اب عشقِ بُتاں کیسے ہو
ہدہد الہ آبادی
No comments:
Post a Comment