آغاز سے انجام کی دیتا تھا خبر میں

 آغاز سے انجام کی دیتا تھا خبر میں

اب لوگ سمجھتے ہیں مِری بات مگر میں

اک بار ہی آواز لگاتا ہوں یقیناً

پھر گونج سے لگتا ہے کہیں بارِ دِگر میں

اب بیٹھے ہوئے دیکھ رہا ہوں یہ تسلسل

کچھ رنگ عناصر کے بدلنے تھے اگر میں

اک اور تناظر میں لکھا جائے گا مجھ کو

اک اور تمدن ہے اُدھر اور اِدھر میں

اوروں سے لڑائی تو مِری بنتی نہیں ہے

ہاں خود سے الجھنا ہو تو پھر ایسا نڈر میں

یوں لوگ تو کہتے ہیں کہ صابر ہے بلا کا

جوں دل پہ گزرتی ہے تو پھر کس کو خبر میں

وہ رنج میں بیٹھا ہو کہیں ہار کے دنیا

اور سوچ کے پچھتائے پھروں کاش اگر میں

مدثر عباس