موج غم اس لیے شاید نہیں گزری سر سے

 موج غم اس لیے شاید نہیں گزری سر سے

میں جو ڈوبا تو نہ ابھروں گا کبھی ساگر سے

اور دنیا سے بھلائی کا صلہ کیا ملتا

آئینہ میں نے دکھایا تھا کہ پتھر برسے

کتنی گم سم مِرے آنگن سے صبا گزری ہے

اک شرر بھی نہ اڑا روح کی خاکستر سے

پیار کی جو سے گھر گھر ہے چراغاں ورنہ

اک بھی شمع نہ روشن ہو ہوا کے ڈر سے

اڑتے بادل کے تعاقب میں پھرو گے کب تک

درد کی دھوپ میں نکلا نہیں کرتے گھر سے

کتنی رعنائیاں آباد ہیں میرے دل میں

اک خرابہ نظر آتا ہے مگر باہر سے

وادئ خواب میں اس گل کا گزر کیوں نہ ہوا

رات بھر آتی رہی جس کی مہک بستر سے

طعنِ اغیار سنیں آپ خموشی سے شکیب

خود پلٹ جاتی ہے ٹکرا کے صدا پتھر سے

شکیب جلالی