پچھلی شب خواب محبت کا دکھایا گیا تھا

 پچھلی شب خواب محبت کا دِکھایا گیا تھا

صبح میں پیڑ سے لٹکا ہوا پایا گیا تھا

ان پہ ظاہر تھا میرا عشق حسینی، تبھی تو

تپتے صحرا میں مجھے دھوکے سے لایا گیا تھا

پہلے سورج کِیا کرتا تھا زمین کی گردش

پھر زمیں کو بھی اسی طرح گُھمایا گیا تھا

دیکھنے والا تھا منظر وہ کُھلی آنکھوں سے

جب میں زنجیر بکف شہر میں لایا گیا تھا

اس ہتھیلی پہ اُگائے گئے زخموں کے گُلاب

جس ہتھیلی پہ نیا خواب سجایا گیا تھا

رحمان مصور