تم ان آنکھوں کا درد جان ہی نہیں سکتے

 تم ان آنکھوں کا درد جان ہی نہیں سکتے

جو دن کی پہلی کرن سے رات کے گہرا ہونے تک 

تمہاری دستک کے انتظار میں 

آس بھری نگاہیں دروازے پر جما کر 

ہر لمحے کو سِسک کر گزارتی 

بالآخر بے مرادی کی سند میں بے آس ہوتی 

نم پلکیں جھکا کر اپنی جگہ سے ہٹ جاتی ہے

اس سمے ان آنکھوں کی کملی ذات کا ضبط 

جسم کے پنجرے میں سر پٹخ کر 

بلکتے ہوئے چلا کر کہہ رہا ہوتا ہے

کاش کسی ایک روز

تم دروازے کے اس پار 

تمہارے انتظار میں لمحہ لمحہ بکھر کر 

بے آرزو ہوتی ان آنکھوں کی 

کملی ذات کے در پر دستک دو

اور تب بدلے کی آگ میں جُھلستا 

ان آنکھوں کی کملی ذات کا ضبط 

تم سے ہر لمحے کا بدلہ لینے کو 

اس کی سماعت کو بہرہ کر دے

تم دستک دو اور دیتے ہی رہو

اس قدر کہ تمہارے ہاتھ تھک کر 

ہاتھ کی ہر نس کو ابھار دیں

انتظار کی سُولی پر کھڑے تمہارے پاؤں 

سُوجھ کر سُرخ ہو جائیں

تھکن کی زیادتی تمہیں دراز قد سے گراتے ہوئے 

دروازے کی چوکھٹ پر گرا دے

تم گر کر ان آنکھوں کی کملی ذات کو 

اس کے نام سے پکار کر دستک دے کر 

تھک چکے ہاتھ گرا کر رو دو

پھر شاید تم جان سکو کہ

دن کے آغاز سے رات کی گہرائی تک 

تمہاری دستک کی آس کسی کو 

کس قدر بے آس کر دیا کرتی ہے

کون کس طرح روز آرزو کو 

بے آرزو کرتا ہوا رو دیا کرتا ہے

مگر ان آنکھوں کی کملی ذات کا ضبط

اس ذات کو تمہارے جانے کا ملال اوڑھے دیکھ کر 

اس قدر پُر ملال رہتا ہے کہ وہ خود دعا کرتا ہے

کاش کسی ایک روز تم

تمہارے جانے کا ملال اوڑھ کر 

خود کو سیاہ بخت کہتی اس ذات کے در پر دستک دے لو

اعلٰی و ارفع ذات کی قسم

تمہاری آدھی ادھوری دستک پر ہی 

وہ دیوانہ وار ننگے پاؤں دوڑ کر آئے گی

دروازے کے اس پار تمہیں پا کر 

وہ گُھٹنوں کے بل گرتے ہوئے 

تمہارے قدموں کے بوسے لے گی

اس کی دیوانگی پر وہ تمہیں ہنستا دیکھ کر 

بہت سارا کھلکھلا دے گی

وہ لرزتے وجود کو 

مشکل سے پیروں کے سہارے دراز قد رکھتے ہوئے 

تمہارے بازو سے لپٹ جائے گی

وہ خوشی سے لرزتی آواز میں تمہیں پکار کر 

سارا گھر سر پر اٹھا لے گی

تمہارے آنے کی خوشی میں وہ دونوں ہاتھ بھر کر 

صدقہ خیرات کرے گی

گھر کی ساری بتیاں روشن کر کے 

جشن کا اعلان کرے گی

ہر سَکھی سہیلی کے بازوں میں بازوں ڈالے 

گھنٹوں کِکلی کھیلتے گزار دے گی

یقیناً وہ کملی ذات تمہیں پھر سے پا کر 

اپنی ذات کے غرور میں لوٹ آئے گی

وہ دعا کو گرا چکے ہاتھ پھر سے اٹھا کر 

تمہاری حیات کی درازی کے لیے پتھر کر دے گی

ایسا ممکن کرنے کے لیے

کاش تم کسی ایک روز

تمہارے لیے ماٹی ہوتی ذات کے در پر دستک دے کر 

اس کے انتظار کو اختتام بخش دو 

فرح طاہر