خامشی سے ہوئی فغاں سے ہوئی

 خامشی سے ہوئی فُغاں سے ہوئی

ابتداء رنج کی کہاں سے ہوئی

کوئی طائر ادھر نہیں آتا

کیسی تقصیر اس مکاں سے ہوئی

موسموں پر یقین کیوں چھوڑا

بد گمانی تو سائباں سے ہوئی

بے نہایت سمندروں کا سفر

گفتگو صرف بادباں سے ہوئی

یہ جو الجھی ہوئی کہانی ہے

معتبر حرف رائیگاں سے ہوئی

دل کی آبادیوں کو پوچھو ہو

روشنی برق بے اماں سے ہوئی

تشنگی بے بسی لبِ دریا

میری پہچان ہی وہاں سے ہوئی

اتنی اجلی نہ تھی یہ راہگزر

نقش پائے بلا کشاں سے ہوئی

ادا جعفری