مدت سے مری آنکھ میں پانی بھی نہیں یے

 مدت سے مِری آنکھ میں پانی بھی نہیں یے

رونے کے لیے کوئی کہانی بھی نہیں ہے

میں پانی کا برتن لیے کیوں بھاگ رہا ہوں

جب میں نے کوئی آگ بجھانی بھی نہیں ہے

دروازے پہ دستک لیے، بیٹھا ہے بڑھاپا

اور کمرے میں بچپن بھی جوانی بھی نہیں ہے

کس طرح سے ڈھونڈوں گا تجھے بھیڑ میں کھو کر

تیری تو مِرے پاس نشانی بھی نہیں یے

کل تک وہ مرے پاس یہیں بیٹھا ہوا تھا

یہ بات کوئی اتنی پرانی بھی نہیں ہے

بستر پہ پڑا خواب ابھی جاگ رہا ہے

اب نیند مرے کمرے میں آنی بھی نہیں ہے

لہجے نے ہر اک راز اگل دینا ہے طاہر

آنکھوں نے کوئی بات چھپانی بھی نہیں ہے

سلیم طاہر