مرے مکان سے پہرا کبھی اٹھا ہی نہیں

 مِرے مکان سے پہرہ کبھی اٹھا ہی نہیں

میں بھاگ جاتا مجھے راستہ ملا ہی نہیں

ستم شعاروں کی موجودگی سے لگتا ہے

ابھی زمیِں پہ کوئی معرکہ ہوا ہی نہیں

ہوائیں کرتی ہیں کس منزِل مراد کا شور

گجر بجا ہی نہیں کارواں چلا ہی نہیں

تو کیوں ہواؤں کو اپنے خلاف کرتا ہے

سوال یہ ہے تِرے پاس جب دِیا ہی نہیں

تمام عمر چلا پھر بھی اک مقام پہ ہوں

خیال آپ سے آگے کبھی گیا ہی نہیں

مسائل اتنے تھے دنیا کے اپنے ساتھ ظفر

کہ خود سے ملنے کا موقع کبھی ملا ہی نہیں

ظفر گورکھپوری