اس تیرے سر کی قسم فرق سر مو بھی نہیں

 اس تیرے سر کی قسم فرق سرِ مو بھی نہیں​

جس قدر ہم ہیں پریشاں، تِرے گیسو بھی نہیں​

موت نے کتنا کج اخلاق بنایا ہے مجھے ​

لوگ روتے ہیں مِری آنکھ میں آنسو بھی نہیں ​

رات بھر جلنا ہے، آ جا ادھر اے پروانے ​

قابلِ رحم یہاں میں بھی نہیں، تُو بھی نہیں

​اب تو دامن پہ لہو ہے، کہو کیا کہتے ہو​

اب تو انکارِ ستم کا کوئی پہلو بھی نہیں​

جا تجھے ہم نے بس اے عمرِ رواں دیکھ لیا​

ہم تجھے اپنا سمجھتے تھے مگر تو بھی نہیں​

میری میت پہ یہ اظہارِ الم رہنے دے ​

رونے والے تِری آنکھوں میں تو آنسو بھی نہیں​

دلِ مایوس میں احساسِ خودی تک نہ رہا​

ایسا مرجھا گیا یہ پھول کہ خوشبو بھی نہیں​

سوچتا ہوں یہ کہ دنیا میں اندھیرا کیوں ہے ​

تیرے چہرے پہ تو بکھرے ہوئے گیسو بھی نہیں​

کتنا ہمدرد ہے،۔ ہمدردئ رہبر دیکھو​

کارواں لٹ گیا اور آنکھ میں آنسو بھی نہیں​

اے قمر شب کے اندھیرے میں لحد ہے میری​

شمعِ تُربت تو بڑی چیز ہے، جگنو بھی نہیں

استاد قمر جلالوی