اداس رستوں کو حیران چھوڑ دیتے ہیں
تمہارے کہنے پہ ملتان چھوڑ دیتے ہیں
تُو جانتی ہی نہیں آسماں سے آئی ہوئی
کہ جنتوں کو بھی انسان چھوڑ دیتے ہیں
یہ شہری لوگ تو لمبے سفر کے دوست نہیں
ذرا سا دیکھ کے نقصان چھوڑ دیتے ہیں
بہانہ دیتے ہیں تم کو سُلگتی آنکھوں کا
سرہانے میر کا دیوان چھوڑ دیتے ہیں
محبتوں میں نہیں لاتے بیچ مذہب کو
کہ طاقچوں ہی میں قرآن چھوڑ دیتے ہیں
چلو بہاتے ہیں تحفے تمہارے نیلم میں
تمہاری جان، مِری جان چھوڑ دیتے ہیں
احمد عطاءاللہ
No comments:
Post a Comment