دُعا
دُعا کے رتھ پر سوار لڑکی
تمہاری آنکھوں کو
معجزوں پر یقین کیوں ہے
زمیں ہے بنجر
فلک مقفّل
نوائیں بے بس
تمنا بے کل
دُعا کے رتھ پر سوار لڑکی
تمہاری قسمت میں کوئی جُگنو نہ کوئی نغمہ
کوئی کنایہ نہ استعارہ
حِنا سے بوجھل ہتھیلیوں پر اُداس اور نا مُراد آنکھیں
خطِ مقدّر کو دیکھتی ہیں
سوالی نظریں یہ پُوچھتی ہیں؟
نگاہِ اُلفت کے خُوشنما، خُوش گلو پرندے
گُلوں سے بوجھل شجر پہ پھر سے حیات اپنی بسر کریں گے
کوئی محبت بھرا صحیفہ
زمینِ دل پر اُتر سکے گا؟
دُعا کے رتھ پر سوار لڑکی
گُماں یقیں میں بدل سکے گی؟
کسی بھی معجز نُما گھڑی کو
وہ اپنی مُٹھی میں بھر سکے گی؟
صائمہ قمر
No comments:
Post a Comment