ہم پرچم حیات اٹھائے ہوئے تو ہیں

 ہم پرچمِ حیات اٹھائے ہوئے تو ہیں

آنکھیں ستمگروں سے ملائے ہوئے تو ہیں

ہر چند زخم زخم ہیں یہ رہروانِ شوق

کانٹوں سے پیرہن کو سجائے ہوئے تو ہیں

بے چہرہ ہو کے رہ گئے فنکار آج کے

ہم اپنا ایک نقش بنائے ہوئے تو ہیں

ہوں کامیابِ شوق کہ اب نامرادِ شوق

بازی سروں کی اپنے لگائے ہوئے تو ہیں

ظلمت کدے میں وہم و گماں کے عزیز ہم

قندیل آگہی کی جلائے ہوئے تو ہیں

عزیز احمد بگھروی