عارفانہ کلام حمد نعت منقبت
منقبت بر مولا علیؑ
خون کا اک فوارہ پھوٹا نور بھری پیشانی سے
مسجد کا ماحول اچانک سُرخ ہوا نورانی سے
دودھ کا کُوزہ چھوڑ دیا قاتل کی پیاس بُجھانے کو
حیدرؑ نے افطار کیا تھا آخری روزہ پانی سے
دروازے نے شاہِ زمن کا دامن تھام کے بین کیا
آپؑ کی رخصت بھر دے گی اس آنگن کو ویرانی سے
وہ اس واسطے ابنِ ابو طالبؑ کے خون کی پیاسی تھی
اس نے کیا آگاہ بشر کو دنیا کی ارزانی سے
فُزت وَربِ الکعبہ کا اعلان گواہی دیتا ہے
شہرِ بقا کے فرمانروا کا کوچ ہے دارِ فانی سے
بیٹیاں باپ کا سرخ عمامہ دیکھ کے آہیں بھرتی ہیں
بیٹے باپ کے زخموں کو دھوتے ہیں اشک فشانی سے
گھر کے در و دیوار سے ظاہر تھے آثار یتیمی کے
عید کے دن بھی گونج رہا تھا کوفہ نوحہ خوانی سے
عدنان محسن
No comments:
Post a Comment