جب سے اس کا ساتھ چھٹا ہے

 اس کی سہیلی سے

جب سے اس کا ساتھ چھٹا ہے

میری طرح تم بھی بے کل ہو

کتنی حیران، کتنی گم صم

دیکھ کے تم کو اس عالم میں

اب مجھ کو بھی رحم آتا ہے

تم اس کی ہمراز رہی ہو

میری محبت ہی کی خاطر

تم اس کی غماز رہی ہو

تم کو مجھ سے ہمدردی ہے

اس کا میں ممنون بہت ہوں

لیکن اب میں سوچ رہا ہوں

تم بھی تنہا رہ نہ سکو گی

اپنی سہیلی ہی کی طرح سے

تم بھی اک دن روپ بھرو گی

اپنا ساتھی طے کر لو گی

پھر تم بھی مجھ سے نہ ملو گی

ہمدردی مجھ سے نہ کرو گی

رحمان جامی