داستان غم شبیر کہی جاتی ہے

 عارفانہ کلام حمد نعت منقبت

داستانِ غمِ شبیرؑ کہی جاتی ہے

جو بھی آواز ہے فریاد بنی جاتی ہے

قافلہ دور گیا شام کی راہوں میں مگر

اب بھی زنجیر کی جھنکار سنی جاتی ہے

ٹوٹ جائے نہ تیری آس خدا خیر کرے

بنتِ زہراؑ شبِ عاشور ڈھلی جاتی ہے

منتظر کب سے سکینہؑ ہیں درِ خیمہ پر

اے علمدارؑ! بہت دیر ہوئی جاتی ہے

سر بکف دیکھ کہ حیدرؑ کے پسر کو رن میں

آنکھ تقدیرِ الٰہی کی جھکی جاتی ہے

نوکِ نیزہ پہ ہے قرآن کی تلاوت جاری

یوں کہانی بھی اسیروں کی کہی جاتی ہے

اک اشارہ ہے پیمبر کا جنازہ اختر

بات کہنے کی جو ہوتی ہے کہی جاتی ہے

اختر چنیوٹی

اختیار حسین