یار محسوس کر میرا دیوانہ پن

 اشارے

یار محسوس کر 

میرا دیوانہ پن 

تھوڑی فُرصت میں بیٹھ اور اتنا بتا 

کیوں مِرے ذہن کی بس یہی ایک ڈیوٹی لگی ہے 

کہ تجھ کو ہی سوچا کرے

کیوں مِری آنکھ تیرے سوا 

کوئی چہرہ نظر آنے پہ بند ہو جاتی ہے

میرے سوکھے لبوں پہ تِرے نام سے چاشنی آنے لگتی ہے 

کیسے بتا

دو جہاں کی پریشانیوں سے مِرا یہ دلِ بے خبر 

کیوں تِری ہی خبر رکھتا ہے

سوچ تو

کیوں تِرے ذکر پہ دھڑکنوں میں یہ بے ربطگی ہوتی ہے

تیرے ہاتھوں کو چُھونے کی حسرت لیے 

کیوں مِرے ہاتھ بے ساختہ اُٹھتے ہیں

میں چلوں جس طرف، میں جہاں بھی چلوں 

پاؤں میرے مجھے کیوں تِری ہی گلی کی طرف لے چلیں

مختصر بات کہ 

باعثِ راحتِ جاں تِری دید ہے 

میں یہ سارے کا سارا تِری قید میں ڈھونڈتا ہوں سکوں

تھوڑی فُرصت میں بیٹھ اور اتنا بتا

کیا تجھے یہ اشارے محبت کی جانب نہیں لگ رہے

عبداللہ ضریم