اب وہ رہنے دیں گے مجھے سکون سے

 I ask for silence 

اب وہ رہنے دیں گے مجھے سکون سے

تاکہ میری عدم موجودگی سے مانوس ہو جائیں

اب میں آنکھیں بند کرنے لگا ہوں

میری  خواہشات ہیں صرف پانچ

پانچ چنیدہ سرچشمے

پہلی، ایک لا متناہی محبت

دوسری، خزاں کا نظارہ

کہ میں وجود نہیں رکھتا، زمین پر اڑتے گرتے اپنے پتوں کے بغیر

تیسری، ایک متبرک موسمِ سرما

اور اس کی بارش، جسے میں نے چاہا

اور ایک آگ کا لمس، سخت جاڑے کی رات میں

چوتھی، گرمیوں کا موسم دیکھنا

جو کسی خربوزے کی طرح گداز ہو

اور پانچویں، تمہاری آنکھیں

اے میری دلربا، میری ٭ماتلدا

میں نہیں سو سکتا، تمہارے آنکھوں سے دور

کہ میں کہیں بھی نہیں ہوتا، سوائے تمہاری نگاہ کے

میں ترتیب دے چکا ہوں بہار کو، 

کچھ ایسے کہ تم

ڈھونڈ سکو گی مجھے اپنی آنکھوں سے

 شاعری؛ پابلو نرودا 

اردو ترجمہ؛ محمد طلال

٭ماتلدا: Matilda