جن پر تری نگاہ پڑی وہ سنور گئے
جن سے تِری نگاہ پھری وہ بکھر گئے
اس دور پر ملال میں آئے گی کیا ہنسی
خنداں لبی کے یار زمانے گزر گئے
منزل تمام عمر نہیں مل سکی انہیں
رستے میں پا کے چھاؤں کہیں جو ٹھہر گئے
آلامِ زندگی میں مزہ زندگی کا ہے
وہ کیا جیئیں گے جو غمِ دوراں سے ڈر گئے
خودداری و ضمیر و وفا جن کی مر گئی
وہ لوگ اپنی موت سے پہلے ہی مر گئے
آشفتگانِ عشق کا عالم نہ پوچھیے
نکلے تِری طلب میں تو واپس نہ گھر گئے
دونوں جہاں میں ہیں وہی سرخرو اثر
دار و رسن سے ہنستے ہوئے جو گزر گئے
اثر بہرائچی
No comments:
Post a Comment