تو عطا میرے لیے غیب سے ساماں کر دے

 عارفانہ کلام حمد نعت منقبت

تُو عطا میرے لیے غیب سے ساماں کر دے

میرے معبود! مِری زندگی آساں کر دے

شاخ در شاخ وفا کے گُل صد رنگ کِھلا

میرے اس دشتِ تمنا کو گُلستاں کر دے

ظُلمتِ یاس میں دم گُھٹنے لگا ہے میرا

مہر اُمید کے جلووں کو نمایاں کر دے

اس سے پہلے کہ ہو احساس تہی دامانی

گُلِ مقصود سے لبریز یہ داماں کر دے

کر مصیبت میں مِرے دل کو عطا صبرِ جمیل

مجھ کو رُسوا نہ کہیں دیدۂ گریاں کر دے

یہ تِری شان ہے یہ ہے تِری عظمت مولا

تُو نہیں کو بھی اگر چاہ لے تو ہاں کر دے

بے یقینی کے مرض سے مجھے مِل جائے نِجات

تو مِرے واسطے تجویز وہ درماں کر دے

راہِ منزل میں بہ ہر گام پریشاں ہے ظفر

اب عطا اس کو بھی تسکینِ دل و جاں کر دے

ظفر انصاری