یہ در عقدہ کشا ہے یہاں ایسا نہیں

 عارفانہ کلام حمد نعت منقبت

یہ درِ عُقدہ کُشا ہے یہاں ایسا نہیں

مُشکلیں حل نہ ہوئی ہوں کبھی دیکھا تو نہیں

طالبِ فقر تیرا طالبِ دُنیا تو نہیں

یہ گدائے شہِ کونینؐ ہے کوئی منگتا تو نہیں

جس کا سایہ نظر آیا نہ جہاں والوں کو

یہ کہیں خالقِ کونین کا سایہ تو نہیں

تم شبِ ہجر کی لِلہ سحر مت مانگو

غمگسارو! یہ میرے غم کا مداوا تو نہیں

ضبطِ غم عشق کی معراج ہے شب بیدارو

اشک جم جاتا ہے پلکوں پہ، ڈھلکتا تو نہیں

اے مدینے کے مسافر! مجھے لِلہ بتا

مجھ سا مہجور کوئی راہ میں دیکھا تو نہیں

یہ جو کملی میں خُدائی کو لیے بیٹھا ہے

یہ کہیں حُسنِ مشیت کا سراپا تو نہیں

کوہِ فاراں کا چراغ آج بھی روشن ہے ہلال

کُن کی تنویر ہے یہ طُور کا جلوہ تو نہیں

ہلال جعفری