عارفانہ کلام حمد نعت منقبت
تکتی رہتی ہیں رہِ طیبہ مسلسل آنکھیں
شوقِ دیدار میں ہو جائیں نہ پاگل آنکھیں
مجھ سے بڑھ کر مِری آنکھوں کو مدینے کی طلب
میں نہ جاؤں تو چلے جائیں گی پیدل آنکھیں
سفرِ شہرِ نبیﷺ کرنا چراغوں کے بغیر
رات ہو جائے تو بن جائیں گی مشعل آنکھیں
نقشِ پا انﷺ کے چمکتے سرِ خاک عرب
انؐ کے قدموں کے نشاں جیسے مکمل آنکھیں
انؐ کے دیدار کی نسبت یہ ہوئیں شہر مزاج
اور محرومِ زیارت ہوں تو جنگل آنکھیں
منظرِ شہرِ نبیﷺ آنکھ میں آئے اور پھر
ایسی نیند آئے کہ ہو جائیں مقفّل آنکھیں
فرطِ جذبات میں دربارِ نبیﷺ میں خالد
اس طرح ٹُوٹ کے برسیں کہ ہوں بادل آنکھیں
خالد عرفان
No comments:
Post a Comment