رات بھر جلتا رہا ہے اپنے ساتھ

 رات بھر جلتا رہا ہے اپنے ساتھ

ایک آنکھوں کا دِیا ہے اپنے ساتھ

جب سے تُو چلنے لگا ہے اپنے ساتھ

شہر کا ہر راستہ ہے اپنے ساتھ

ایک رانی تھی کہانی میں جِسے

پڑھنے والا لے گیا ہے اپنے ساتھ

مجھ کو تنہا چھوڑنے والا نہیں

درد بھی چِمٹا ہُوا ہے اپنے ساتھ

وہ اُجالا دینے آیا تھا مجھے

میری آنکھیں لے گیا ہے اپنے ساتھ

سب تماشائی بھی اب حیران ہیں

کھیل وہ کھیلا گیا ہے اپنے ساتھ

دل نہیں لگتا لگانے سے کہِیں

کیا کہیں کیا کچھ ہُوا ہے اپنے ساتھ

اشرف کمال