آ گئی کیا دل میں پھر سے یاد یار ذی سلم (اردو ترجمہ قصیدہ بردہ)

 عارفانہ کلام حمد نعت منقبت

مَولَایَ صَلِ وَسلِّم دَائماً اَبَداً

علیٰ حَبِیبِکَ خَیرِ خَلقِ کُلِّھمِ (بوصیری)

آ گئی کیا دل میں پھر سے یادِ یارِ ذی سلَم

خون ہو کر بہ رہا ہے دل مسلسل، دم بہ دم

کاظمہ سے کیا کوئی پیغام لائی ہے صبا؟ 

برق ساں جلوہ نما ہیں یا وہؐ بر کوہِ اِضَم؟ 

اس قدر گریہ کُناں  آنکھیں سنبھلتی ہی نہیں 

اس قدر آشفتگی اٹھتا نہیں ہے بارِ غم

رازداری عشق میں ممکن نہیں، اے سادہ دل

کیا چھپاؤ گے تپش دل کی ان آنکھوں کا یہ نم

ارتکابِ جرمِ الفت سے کہاں انکار ہو 

شاہدانِ معتبر ہیں زرد روئی، چشمِ نم

سرخیٔ خوناب  ہے مرجھائے چہرے پر عیاں 

جس طرح پت جھڑ کی رُت میں سُرخ ہو شاخِ عنَم 

خواب سے محروم رکھتا ہے خیالِ جانِ جاں 

عشق کے آزار ہیں رنج و تعب، درد و الم

صاحبانِ دل ملامت کے نہیں ہیں مستحق 

ہے تقاضائے عدالت، معذرت بہرِ کرم

کھل گیا اپنے پرائے سب پہ میرا حالِ دل 

روگ کیسے چھپ سکے جب درد اُٹھتا ہو اَتَم 

کلام؛ امام محمد شرف الدین البوصیری شاذلی

اردو ترجمہ؛ نجیبہ عارف