عارفانہ کلام حمد نعت منقبت
کس طرح چاند نگر تک پہنچوں
آپﷺ بُلوائیں تو در تک پہنچوں
چُومتے چُومتے قدموں کے نقوش
عرش کی راہ گُزر تک پہنچوں
شب غم سے کسی صُورت نکلوں
اور دامانِ سحر تک پہنچوں
میں کہ غُربت کے سفر میں ہوں مدام
اک اشارہ ہو تو گھر تک پہنچوں
میں کہ ہوں آہِ پریشاں آقاﷺ
اِذن ہو، بابِ اثر تک پہنچوں
میں کہ آنسُو ہوں مگر خاک کا رزق
کاش معراجِ نظر تک پہنچوں
ہو کے تجسیم فغان آدم
روضۂ خیرِ بشر تک پہنچوں
اک پتھر ہی سہی میرا وجود
پھر بھی اس آئینہ گر تک پہنچوں
ڈھانپ لے عیب مِرے خاکِ بقیع
ایسے انجامِ سفر تک پہنچوں
حفیظ تائب
No comments:
Post a Comment