دل ہی دل میں سب سنا کر رو پڑے

 عارفانہ کلام حمد نعت منقبت

دل ہی دل میں سب سُنا کر رو پڑے

اُن کے در پر سر جُھکا کر کر رو پڑے

تابِ ضبطِ غم نہ باقی رہ سکی

آپؐ کے قدموں میں آ کر رو پڑے

حد سے بڑھ کر اضطرابِ قلب تھا

اپنی حالت کو چُھپا کر رو پڑے

مُسکرائے بار ہا روتے ہوئے

بار ہا پھر مُسکرا کر رو پڑے

پاس آئے آ گیا دل کو سکوں

آپؐ سے پھر دور جا کر رو پڑے

کون تھا پُرسانِ حال اُنؐ کے سوا

ہم اُنہیﷺ سے لو لگا کر رو پڑے

پے بہ پے ہوتی رہی نظرِ کرم

پے بہ پے خود کو بُھلا کر رو پڑے

گُنبدِ خضریٰ پہ نظریں اُٹھ گئیں

اپنی نظروں کو جُھکا کر رو پڑے

بخت اپنا، خاکِ طیبہ اور ہم

اُس کو آنکھوں میں بسا کر رو پڑے

بار عصیاں کا اُٹھائیں کس طرح

کچھ جواب اِس کا نہ پا کر رو پڑے

لب پہ آئے ہی نہیں حرفِ دُعا

ہاتھ ہم اپنے اُٹھا کر رو پڑے

لوٹ کر آئیں گے ہے کامل یقیں

پھر بھی ہم اک خوف کھا کر رو پڑے

عارفِ بسمل فراقِ شاہﷺ میں

خُود ہی خُود کو آزما کر رو پڑے

وحیدالقادری عارف