میرے آقا کو خبر تو ہو گی

 عارفانہ کلام حمد نعت منقبت

میرے آقاﷺ کو خبر تو ہو گی

جب بھی یہ چاند اسی طرح اُبھرتا ہو گا

یہ ستارہ بھی یہیں پر ہو گا

شام کی گود میں پھیلے ہوئے کُہسار

یہ مٹی یہ ہوا

ابر اور گرد کے پردے میں نہاں اور عیاں رنگِ شفق

آتشیں رنگ میں گُم ہوتا ہوا تارِ اُفق

سوچتی ہوں

مِرے آقاؐ کی سواری اسی رستے سے گُزرتی ہو گی

خاک کے ذروں پہ اُڑتی ہوئی تقدیر سنورتی ہو گی

اُنؐ کی آنکھوں نے

یونہی ڈھلتی ہوئی شام کو دیکھا ہو گا

رب تخلیق کے اکرام کو دیکھا ہو گا

جانے وہ کون سا لمحہ ہو گا

وقت کی لوح کے کس پہر میں ٹھہرا ہو گا

میرے آقاؐ کو خبر تو ہو گی

اُس طرف قرنوں کی گردش سے پرے

اُسی لمے کی کسی تہہ میں

کسی عکس

کسی پرتو میں

اک گُنہگار کی آنکھیں بھی وہی ارض و سما دیکھیں گی

اُسی لمحے کی کسی چاپ

کسی آہٹ میں

اُس کے لب خاک کو چُھونے کی اجازت لیں گے

اس میں ٹھہری ہوئی صدیوں کی طراوت لیں گے

اس کا دل بھیگ رہا ہو گا

نگاہوں میں تشکر کا اُجالا ہو گا

اپنے آقاؐ سے اُسی ربط کے اک لمحے میں

اس نے کیا کیا نہیں دیکھا ہو گا

اس نے کیا کیا نہیں چاہا ہو گا

میرے آقاﷺ کو خبر تو ہو گی

یاسمین حمید