اٹھیں جو ہاتھ تو سارے سلام تیرے ہوں

 عارفانہ کلام حمد نعت منقبت

اُٹھیں جو ہاتھ تو سارے سلام تیرے ہوں

مِری نظر کے سبھی احترام تیرے ہوں

رہِ حیات میں جتنے سفر بھی میرے ہیں

جہاں رُکوں میرے آقاﷺ مقام تیرے ہوں

قدم قدم پہ ستارے ہوں تیریﷺ رحمت کے

جہاں بھی گُزریں مِرے صبح و شام تیرے ہوں

زمینِ دل پہ فقط نُور ہے مدینے کا

مِرے نصیب میں بخشش کے جام تیرے ہوں

کہوں جو بات تو بس تیراﷺ ہی حوالہ ہو

یہ لب کُھلیں بھی تو میرے کلام تیرے ہوں

زمانے بھر کی مجھے گُفتگو سے کیا لینا

جو میرے نام ہوں سارے پیام تیرے ہوں

مِرے حبیبؐ تیری شاہدہ کو کیا ڈر ہے

یہی ہے کافی کہ سب اہتمام تیرے ہوں

شاہدہ لطیف