یہ بہار کیا یہ خزاں ہے کیا مرے دل کے دشت و چمن میں آ

 یہ بہار کیا یہ خزاں ہے کیا مِرے دل کے دشت و چمن میں آ

کبھی پُھول پُھول پھبن میں آ،۔ کبھی خار خار چُبھن میں آ

تِرے ہات میں مِرا ہات ہو، تِری بات میں مِری بات ہو

نہ کبھی حیات میں مات ہو، مِری عاشقی کے چلن میں آ

تِرا پُھول پُھول ہے پیرہن، تِرا رنگ رنگ ہے بانکپن

تجھے دیکھنے میں رہوں مگن مِرے دیکھنے کی لگن میں آ

مِری درد درد ہے زندگی،۔ مِری کرب کرب ہے آگہی

مِری سوز سوز ہے نغمگی، مِرے رنگِ شعر کے فن میں آ

تُو کہاں ہے زرمئ خُوش بیاں! تُو کہاں ہے شاعرِ خُوش گُماں

ہمہ تن ہوں چشمِ طلب یہاں،۔ کبھی روبرو، کبھی من میں آ

بشیر رزمی