قیامت ہے مگر بھولی ہوئی ہے

 قیامت ہے مگر بُھولی ہوئی ہے

بچھڑنے کی وبا پھوٹی ہوئی ہے

تِری آنکھوں کے حلقے کہہ رہے ہیں

کہ تجھ سے زندگی رُوٹھی ہوئی ہے

مِری وحشت مِرے جانے سے پہلے

کسی کی آنکھ میں ٹھہری ہوئی ہے

سیہ شب ہے کسی کی رخصتی ہے

دِیے کی لو تلک سہمی ہوئی ہے

یہ کس نے ہونٹ رکھے ہیں جبیں پر

اُداسی نیند تک پھیلی ہوئی ہے

بچھڑ کے وقت کٹتا جا رہا ہے

مگر میں نے گھڑی روکی ہوئی ہے

محبت کون سی، کیسی محبت؟

تمہیں کوئی غلط فہمی ہوئی ہے

عرفان شاہد