وداع پنہاں الوداع اے جان روح والد تربت نشیں

 وداعِ پنہاں ہمشیرہ رابعہ پنہاں کی مرگ پر لکھا گیا کلام

الوداع اے جانِ روحِ والدِ تُربت نشیں

الوداع اے نُورِ عینِ مادرِ غم آفریں

الوداع اے حُسنِ اُلفت، دُخترِ شیریں مقال

الوداع اے جملۂ افسانۂ طُور و جمال

الوداع اے نکہتِ گُلہائے گُلزارِ وطن

الوداع اے اے بُلبلِ رنگیں بیاں شیریں دہن

الوداع اے اے لولوئے دریائے سخن

الوداع اے نُورِ صُبحِ نوبہارِ گُل فگن

الوداع اے افسرِ جادو نگارانِ وطن

الوداع اے شاعرِ فردوس دُنیائے سخن

الوداع اے نکتہ پرور صاحبِ احساس و ہوش

نکتہ فہم و نکتہ داں، نکتہ بہ دل نکتہ بگوش

تُو نے اک جُنبش میں پردہ پارہ پارہ کر دیا

جلوۂ حُسنِ نہاں سب آشکارا کر دیا

تجھ سے شمعِ زندگانی مست و روشن ہو گئی

ظُلمت صد دشت و صحرا، رشکِ ایمن ہو گئی

تُو نے رمزِ شعریت سب آشکارا کر دئیے

جلوۂ علم و عمل پردہ سے بے پردہ کیے

تُو نے دُنیا میں تقلیدِ شعارِ فاطمہؑ

ہے تِری تطہیر میں پنہاں وقارِ رابعہ

ہے تِرا فہم و ذکا ہم پایۂ نُور جہاں

بذلہ سنجی میں تِری زیب النساء ہے گُلفشاں

اے منزہ شاہزادی حُور رفعت پاک حال

قُدس طینت، قُدس رفعت، قُدسِ دل، قُدسی جمال

ہم سے رُخصت ہو رہی ہے آج یوں با چشمِ تر

ٹکڑے ٹکڑے قلب ہے اور پارہ پارہ ہے جگر

گھر کی رونق، دل کی زینت، روشنی آنکھوں کی تھی

قلب کی خامشیوں میں تھی نوائے زندگی

سازِ اُلفت سوز پاتا تھا تِرے پیغام سے

صُبحِ عصمت نُور افشاں تھی درخشاں نام سے

ہیں نچھاور تجھ پہ اپنے اشک ہائے غم نواز

الوداع اے خواہرِ اُلفت چساں، اُلفت طراز

رُوحِ شوہر بن کے پنہاں ہو جہاں میں کامگار

یہ دُعا مقبول ہو میری مِرے پروردگار

بلقیس جمال بریلوی