دوستی مشکل میں تھی اور دشمنی ممکن نہ تھی

 دوستی مُشکل میں تھی اور دُشمنی مُمکن نہ تھی

زندگی تجھ سے مِری اب دل لگی ممکن نہ تھی

جان لیتے گر، دیارِ عشق میں رکھتے قدم؟

جس گُزرگاہ پر کبھی آسُودگی ممکن نہ تھی

اک فقط سادہ دلی نے حشر تک پہنچا دیا

بے حِسوں سے بھی ہماری بے رُخی ممکن نہ تھی

نہ کوئی شکوہ ستم کا نہ جفاؤں پر گِلہ

اس سے بڑھ کر اور مجھ میں عاجزی ممکن نہ تھی

تم جفا کا تاج پہنے آج تک ہو سرخرُو

اور وفاؤں سے ہماری سرکشی ممکن نہ تھی

رات کی تاریکیوں نے راستہ چھوڑا نہیں

دل دِیا بھی پھڑپھڑایا، آتشی ممکن نہ تھی

لوٹ کر آیا تو سارے خواب چکنا چُور تھے

آنکھ تھی ویران، ہونٹوں پر ہنسی ممکن نہ تھی

وقت نے یکسر جُدائی ڈال دی ہے درمیاں

جس تعلق میں ذرا سی بہتری ممکن نہ تھی

ذات کے ادراک میں راجی کہاں تک آ گئی 

ورنہ شاید زاہدہ سے شاعری ممکن نہ تھی

زاہدہ رئیس راجی