مٹا ہے کبرِ عبادت کس اہتمام کے ساتھ
کہ دو سجود ہیں واجب ہر اک قیام کے ساتھ
نہ تھی جو فکر مسلسل سبک مزاجوں کی
ہر ایک سمت میں دوڑے ہوائے بام کے ساتھ
زباں پہ حرفِ دعا ہے تو ساتھ دل بھی جھکے
کِیا درودﷺ کو واجب مگر سلام کے ساتھ
خدا کے گھر میں بشر کے تصرّفات ہیں یہ
خلیل آج بھی باقی ہیں اک مقام کے ساتھ
دماغ توڑ کے یہ دن گزارنے والے
ابھی تو دل بھی جلے گا چراغِ شام کے ساتھ
اِدھر ہے عقل کی قوت، اُدھر ہے لشکرِ جہل
ہیں صف بہ صف حق و باطل کس التزام کے ساتھ
رشید! میرے تعارف میں دیر کیا ہو گی
میں آؤں گا سرِ محشر مِرے امام کے ساتھ
رشید ترابی
No comments:
Post a Comment