میرے رازداں میری بات سن

میرے رازداں میری بات سُن

یہ جو چار سُو ہیں اُداسیاں

یہ جو تِیرگی کا حِصار ہے

دلِ منتظر کی شکستگی

یہ جو خواہشوں کا غُبار ہے

میرے چارہ گر، میرے بے خبر

میرے ہمنوا! میرے پاس آ

میرے دل کے کچّے مکان میں

کبھی ننگے پاؤں اُتر ذرا

نہ سوال ہوں، نہ جواب ہوں

نہ شکایتیں، نہ وضاحتیں

نہ ہی کوئی حرفِ ملال ہو

میری آنکھ ہو تیرا آئینہ

تیری آنکھ ہو مِرا آئینہ

میرا ایک پَل تو مجھے مِلے

میری اک دُعا تو قبول ہو

شبِ ہجر! تیرے غرُور پر

کبھی چاندنی کا نزُول ہو

ذیشان نشتر