گزرے یہ عمر عشق نبی کے حصول میں

 عارفانہ کلام حمد نعت منقبت

دل سے دعا یہ مانگی ہے سجدوں کے طول میں

گزرے یہ عمر عشقِ نبیﷺ کے حصول میں

آیا ہوں گُل کی آس میں پیارے رسولﷺ میں

خارِ گُنہ ہے دامنِ عصیاں ببول میں

اے کاش خواب میں ہو زیارت حضورؐ کی

یہ بات راس آئے دعائے قبول میں

اپنے سبھی اصول ہوں قربان آپ پر

شامل ہے نکتہ یہ بھی ہمارے اصول میں

ہو مصطفٰیؐ کی راہ پہ چلنا ہمیں نصیب

گزرے نہ زندگی یہ ہماری فضول میں

دونوں جہاں کے گنجِ گراں مایہ ہیں عزیز

بکھرے پڑے ہیں آپ کے قدموں کی دھول میں

دنیا کی خوشبوؤں میں نہ جنت میں ہے کہیں

خوشبو بسی ہوئی ہے جو یثرب کے پھول میں

ملتی نہیں جہاں میں کوئی ایک بھی مثال

جو بات ہے شہاب خدا کے رسول میں

شہاب اللہ