کوئی پیغام محبت لب اعجاز تو دے

کوئی پیغامِ محبت لبِ اعجاز تو دے 

موت کی آنکھ بھی کھُل جائے گی آواز تو دے

چشمِ مخمور کے عنوانِ نظر کچھ تو کھُلیں

دلِ رنجور دھڑکنے کا کچھ انداز تو دے​

اک ذرا ہو نشۂ حسن میں اندازِ خمار

اک جھلک عشق کے انجام کی آغاز تو دے

جو چھپائے نہ چھپے، اور بتائے نہ بنے

دلِ عاشق ان آنکھوں سے کوئی راز تو دے

منتظر اتنی کبھی تھی نہ فضائے آفاق

چھیڑنے ہی کو ہوں پُر درد غزل ساز تو دے

ہم اسیرانِ قفس آگ لگا سکتے ہیں

فرصتِ نغمہ کبھی حسرتِ پرواز تو دے

عشق اک بار مشیت کو بدل سکتا ہے

عندیہ اپنا مگر کچھ نِگہِ ناز تو دے

کان سے ہم تو فراقؔ آنکھ کا لے لیتے ہیں کام

آج چھپ کر کوئی آواز پہ آواز تو دے

فراق گورکھپوری