کچھ ایسے دلفریب شگوفے کِھلا کئے
مشقِ خیال سے نہ بنی دل جدا کئے
دریا تو ہے وہی جو ہوا داخلِ محیط
وادی میں ورنہ سیکڑوں نالے بہا کئے
ابناۓ روزگار میں ایسا بھی کوئی ہے
ذاتِ بشر میں کوئی کرامت ضرور ہے
کیوں بات بات اس کی فرشتے لکھا کئے
انسان کی زمام ہے خصلت کے ہاتھ میں
اہلِ جفا کو چین کہاں بے جفا کئے
بدقسمتی سے تُو ہی نہ دوڑا وگرنہ یاں
دن رات خوانِ نعمتِ الواں لٹا کئے
زار و زبوں ہے آج زمانے کے ہاتھ سے
غافل جو بزم ناز کو بیٹھے سجا کئے
شاید کوئی لطیفۂ غیبی ہو آشکار
بیٹھے ہوۓ ہیں تکیہ بفضلِ خدا کئے
شکرِ خدا کہ وجہ شکایت نہیں رہی
مدت ہوئی ہے ترکِ امیدِ وفا کئے
اسماعیل میرٹھی
No comments:
Post a Comment