‎بچہ ہے اس کو یوں نہ اکیلے کفن میں ڈال

‎بچہ ہے، اس کو یوں نہ اکیلے کفن میں ڈال

‎ایک آدھ گڑیا، چند کھلونے کفن میں ڈال

‎کپڑے اسے پسند نہیں ہیں کھلے کھلے

‎چھوٹی سی لاش ہے، اسے چھوٹے کفن میں ڈال

ڈرتا بہت ہے کیڑے مکوڑوں سے اس کا دل

کاغذ پہ لکھ یہ بات اور اس کے کفن میں ڈال

‎عیسیٰ کی طرح آج کوئی معجزہ دکھا

‎یہ پھر سے جی اٹھے، اسے ایسے کفن میں ڈال

‎دفنا اسے حسینؑ کے غم میں لپیٹ کر

‎یہ کربلائی ہے، اسے کالے کفن میں ڈال

‎ننھا سا ہے یہ پاؤں، وہ چھوٹا سا ہاتھ ہے

‎میرے جگر کے ٹکڑے کے ٹکڑے کفن میں ڈال

‎مجھ کو بھی گاڑ دے مِرے لختِ جگر کے ساتھ

‎سینے پہ میرے رکھ اسے، میرے کفن میں ڈال

‎سوتا نہیں ہے یہ مِری آغوش کے بغیر

‎فارس مجھے بھی کاٹ کے اس کے کفن میں ڈال

رحمان فارس