لعنت
لعنت سبھی منحنی دیوتاؤں پہ
نقلی خداؤں پہ
لعنت ہے ماتھا رگڑنے کے کارِ مسلسل پہ
بس اک نشاں ڈالنا جس کا مقصود ہے
اور لعنت ہے باسی دماغوں کی بوسیدگی پہ
کہ جو مسکراہٹ کے سائے میں
احساں جتاتے ہیں
لعنت ہے اس آکسیجن سلنڈر پہ
جس کے لیے قتل کرنا پڑے
چند سانسوں کے قرضے میں
دفنائے جانے کی اس منتظر قوم کو
وینٹی لیٹر کہاں سے ملے گا
کہ وہ تو کہیں چھپ کے بیٹھا
کسی منحنی دیوتا کے لیے منتظر ہے
کہیں پھیپھڑے آکسیجن کو ترسیں تو کام آ سکے
منحنی دیوتا لاکھ لعنت کے حقدار ٹھہرے ہیں
لعنت ہو جس جس نے دھرتی کو کھایا ہے
ان کے دماغوں پہ لعنت ہے
جو شک کے دریا میں بہتے ہیں
دشنام کرتے ہیں اپنے مسیحاؤں کو
اورسمجھتے ہیں جیسے شفاخانے مقتل ہیں
لعنت ہے ان پہ
مسیحا کی نیت پہ جن کو بھروسہ نہیں اور
لعنت ہے اس نسلِ بدکار پر
جو کہ مقتل کے باہر کھڑی
پلازما بیچتی ہے
اور اس پہ بھی
جو عام انساں کو انساں نہ سمجھے
سو لعنت ہے چارٹر جہازوں کے
بے حِس مسافر پہ
لعنت بلڈی سویلین پہ
ہے لعنت سبھی پہ
ثاقب ندیم
No comments:
Post a Comment