بادگیر سے جھانکتا پیامِ قضا
آج کی شب ایک فائل کھوجتے
برسوں بند پڑے دراز کو ٹٹولتے ہوئے
میرے ہاتھ دیمک لگی اک تصویر پرانی لگی
اور یکدم نیم روشن کمرے کی وسعت سمٹ کر
مجھے شکستہ دیواروں میں جکڑنے لگی
پُرپیچ ڈوریوں کے جھرمٹ میں میری تنہائی
مجھے لمحہ بہ لمحہ قتل کرنے پہ اتر آئی
انفس و آفاق کے درمیان پھیلی دنیا
میرے حال سے ناواقف رہی
حبس اور گھٹن کا یہ عالم رہا کہ جیسے کسی نے
زندان کے روزن پر گہری تاریکی کا قفل لگا کر
مجھے کسی زبوں حال قبر میں زندہ ہی گاڑ دیا ہو
درد کی ایک کسک کے ساتھ میں نے
تصویر کے اوپر گرد کی رِدا ہٹا کر پژمردہ آنکھوں سے
دیکھا تو معنی خیز نگاہوں سے گھورتا وہ شخص
ایک مجسمہ بنے ہوئے
میری زندگی کی معیاد ختم ہونے پر
بے ساختہ ہنسی کی گونج کے ساتھ
میری بدلتی حیات کی رُت پر جشن مناتے ہوئے
چلتی ہوا اور گزرتے موسموں سا اوجھل ہونے لگا
اور میرا وجود دکھ کی بھٹی میں تپ کر
موم کی مانند پگھلتا ہوا کس سمت کو بہہ نکلا
یہ میں نہ جان سکی
ماہم کامران
No comments:
Post a Comment