نظام دل میں کہیں بے دلی رکی ہوئی ہے

 نظامِ دل میں کہیں بے دِلی رکی ہوئی ہے

ہنسی سجائی گئی ہے خوشی رکی ہوئی ہے

ابھی بھی اس سے تعلق تو ہے مگر ایسا

ہوا چلی بھی کبھی تو لگی رکی ہوئی ہے

مٹے ہوئے ہیں خدوخال جھیل کے پھر بھی

کہیں کہیں پہ تو اب تک نمی رکی ہوئی ہے

سبھی کو جلدی ہے سبقت کی ایک دوسرے پر

سبک روی ہے، مگر زندگی رکی ہوئی ہے

بہانہ ڈھونڈتے ہیں اختلاف کا ہم سب

نفاق بڑھ رہا ہے، دوستی رکی ہوئی ہے

بھرا ہے وقت نے ہر زخم فائدے سے مگر

مرے وجود میں تیری کمی رکی ہوئی ہے

نشاطِ حسن سے لبریز ہوں بظاہر میں

شمارِ شوق میں تشنہ لبی رکی ہوئی ہے

اجمل فرید