کوئی کسی کا یار اب نہیں رہا

 کوئی کسی کا یار اب نہیں رہا

وفا کا پاسدار اب نہیں رہا

یہ گفتگو تو ہو رہی ہے عادتاً

وہ عشق وہ خمار اب نہیں رہا

تری نظر کا تیر اے ستم شعار

جگر کے آر پار اب نہیں رہا

نکل چکی ہیں عشق کی کثافتیں

لہو میں انتشار اب نہیں رہا

رلا دیا فسانۂ رقیب نے

وہ میرا غمگسار اب نہیں رہا

کسی کی بے رخی نے چھین لی ہنسی

مزاجِ پُر بہار اب نہیں رہا

کبھی تو مجھ کو یاد کر کے روئے گا

جو کہہ رہا ہے پیار اب نہیں رہا

بھلا چکا ہے وہ مرے وجود کو

مجھے بھی انتظار اب نہیں رہا

ملے ہوئے ہیں رہزنوں سے راہبر

کسی کا اعتبار اب نہیں رہا

منزہ سید