بے وفا کو سادگی میں باوفا لکھتی رہی
دھوپ جیسے آدمی کو میں گھٹا لکھتی رہی
وہ مجھے اوراق پر حرفِ غلط لکھتا رہا
میں بیاضِ دل پہ حرفِ دل ربا لکھتی رہی
اس کے کہنے پر اجالوں کو بھی لکھا تیرگی
اس کے کہنے پر اندھیروں کو ضیا لکھتی رہی
جب نہ ابھرا وہ رخِ تاباں سرِ بامِ طلب
آفتابِ آرزو کو میں دِیا لکھتی رہی
حوصلہ دیتی ہوں میں حسرت ناکام کو
میں فنا کی راہ کو راہِ بقا لکھتی رہی
بے دھڑک اس عہدِ بے ترتیب میں مریم سدا
جو بھی آیا میرے جی میں، برملا لکھتی رہی
مریم ناز
No comments:
Post a Comment