جیون بنجر پیاسی سوچیں سوکھا پن اور میں

جیون بنجر پیاسی سوچیں سوکھا پن اور میں

تیرے بن اب سُونا سا ہے گھر آنگن اور میں

ڈھونڈ رہا ہوں تیری آہٹ سونے رستوں میں

بے ہنگم سی ساری سوچیں پاگل پن اور میں

کھنک رہی ہے قرب کی پائل یاد کے صحرا میں

تنہائی کی کالی راتیں دل دھڑکن اور میں

اب تک بوندیں برس رہی ہیں بیتے لمحوں کی

سونے رستے پیاسی نظریں اک ساون اور میں

چھوٹی سی اک بات پہ آنکھیں نم ہو جاتی تھیں

ہنسنے پر بھی چھلک پڑا ہے یہ برتن اور میں

دکھ تکلیفیں زیست کا شاید پہلا حصہ تھیں

لمبے رستے بھاری بستہ وہ بچپن اور میں

ہر اک جانب کچھ تصویریں گھومنے لگتی ہیں

پھٹا پھٹا دیوار و در کا یہ روغن اور میں

بیٹھے بیٹھے گھر کے باہر تکنے لگتا ہوں

ہر آہٹ پر دروازے کا یہ بندھن اور میں

پہروں تیری یاد میں جن سے دل بہلاتا ہوں

ساحل ریت سمندر سیپی نیل گگن اور میں

اب بھی بیتے لمحے میرے کان میں بجتے ہیں

پائل جھمکے چوڑی کنگن اک الجھن اور میں

انجم معین بلے