بہار دل میں رہے زندگی بہاراں ہے

 بہار دل میں رہے، زندگی بہاراں ہے

کہ پیار دل میں رہے، زندگی بہاراں ہے

جگر کے پار اتر جائے تیر ہی کیسا

کٹار دل میں رہے، زندگی بہاراں ہے

چھپائے سے جو چھپےعشق نہیں مُشک نہیں

بخار دل میں رہے، زندگی ہے بہاراں ہے

اتر بھی جائے نشہ اس کے قرب کا لیکن

خمار دل میں رہے، زندگی بہاراں ہے

بچھڑنے والے کو رخصت دعاؤں میں کرنا

حصار دل میں رہے، زندگی بہاراں ہے

نظر میں رمزِِ محبت، لبوں پہ خاموشی

شرار دل میں رہے، زندگی بہاراں ہے

حسابِ دوست دلوں میں وفا شعار رہے

شمار دل میں رہے، زندگی بہاراں ہے

سفر کے گرد تو چھَٹ جائے گی بالآخر

غبار دل میں رہے، زندگی بہاراں ہے

بس ایک سجدۂ شکر ہو ادا منیزہ اب

قرار دل میں رہے، زندگی بہاراں ہے

منیزہ شاہ