اک دِیا آس کا آنگن میں بُجھایا میں نے
اور پھر گھر میں ہواؤں کو بُلایا میں نے
سانس لیتا ہوں تو اندر سے دُھواں آتا ہے
اس قدر سوچ کے جنگل کو جلایا میں نے
کچھ فرشتوں نے مجھے موت کی دھمکی دے دی
ایک سچ کو جو سرِ عام بتایا میں نے
کیسے آئی ہے فضاؤں سے مہک مٹی کی
صرف قطرہ ہی جو پتھر پہ گرایا میں نے
دن جو نکلا ہے تو آنکھیں نہیں کھُلتیں میری
رات بھر جاگ کے سپنوں کو سُلایا میں نے
میرے چہرے پہ کئی نقش بنا ڈالے ہیں
غم کے دریا نے جو آنکھوں سے بہایا میں نے
عمران ملوک اعوان
No comments:
Post a Comment