اے ہم نفساں کار تنفس بھی عجب ہے

اے ہم نفساں!! کارِ تنفس بھی عجب ہے

ہوتا ہے تو لگتا ہے کہ ہونے کے سبب ہے

کس باب میں ہم تختئ دوراں پہ لکھے جائیں

منصب، نہ علاقہ، نہ کوئی نام و نسب ہے

تاریکئ شب میں مِرے ہونے کی گواہی

اک موجِ ہوا تھی، سو وہی مُہر بہ لب ہے

آ جائے تو آنکھوں کی طنابیں کِھنچی رہ جائیں

دیوار کے اُس پار جو اک ماہ لقب ہے

دنیا ہے کہ نکلی چلی جاتی ہے کماں سے

دل ہے کہ کسی زعم میں آرام طلب ہے

اے موجِ غمِ دوست! نِری یاد سرا میں

آنا بھی غضب ہے تِرا، جانا بھی غضب ہے

اے شامِ ملاقات! سلامت کہ ہماری

اس شہرِ دلآویز میں یہ آخری شب ہے

طارق نعیم