اے خدا تو نے بھی کس مان میں رکھ چھوڑے ہیں

 اے خدا تُو نے بھی کس مان میں رکھ چھوڑے ہیں

اپنے کچھ وصف جو انسان میں رکھ چھوڑے ہیں

لاج ان کی ذرا رکھ لے مِری بنجر دھرتی

اسم برکت کو جو کھلیان میں رکھ چھوڑے ہیں

مجھ کو ملہار سنانے نہیں دیتا کوئی

تُو نے وہ نوحے مِری تان میں رکھ چھوڑے ہیں

او ری دیوار! تجھے جھلینا ہوں گے یہ بھی

میں نے کچھ درد تِرے کان میں رکھ چھوڑے ہیں

مِرے سینے میں تو جا ہی نہیں ٹوٹے دل کی

سارے ٹکڑے تِرے سامان میں رکھ چھوڑے ہیں

اب مجھے ہارنا ہو گا کہ مِرے دشمن نے

اپنے ہتھیار مِری شان میں رکھ چھوڑے ہیں

حاکما!! تیری رعایا تو سبھی جانتی ہے

تُو نے جو فیصلے فرمان میں رکھ چھوڑے ہیں

اب یہ سمجھے ہیں جو ٹھوکر سے بڑھی بینائی

تُو نے کچھ فائدے نقصان میں رکھ چھوڑے ہیں

صائمہ اسحاق